عمران خان سے ہاکی میں بہتری کی امید ہے-نوید عالم

لاہور(امت نیوز )پی ایچ ایف کے ڈائریکٹر ڈویلپمنٹ و ڈومیسٹک اولمپئن نوید عالم نے کہا ہے کہ مالی مشکلات کے باوجود پی ایچ ایف نے قومی ہاکی ٹیم کے اراکین اور آفیشلز کے مکمل واجبات ادا کرکے ان سے کیا ہوا اپنا وعدہ پورا کردیا ہے اور اب کھلاڑیوں کو بھی چاہئے کہ وہ پوری محنت سے ایشین گیمز کے لئے تیاری کریں اور گولڈ میڈل جیت کر لائیں ۔یہاں میڈیا سے گفتگو کرتے ہوئے نوید عالم نے کہا کہ پاکستان کی ٹیم میں باصلاحیت کھلاڑیوں کی کمی نہیں ہے اور ٹیم ایشین گیمز میں بہترین کارکردگی دکھانے کی پوری صلاحیت رکھتی ہے ۔میدان میں پرفارمنس کے ساتھ ساتھ جیت کا جذبہ بھی بہت ضروری ہے اور انشاء اللہ ایشین گیمز میں ٹیم بھارت کے خلاف پورے جذبے سے میدان میں اترے گی اور کامیابی حاصل کرے گی۔