خاورمانیکا کی نئی دلہن بشریٰ بی بی کا انتخاب ہیں

امت رپورٹ
تحریک انصاف کے چیئرمین عمران خان کی اہلیہ بشریٰ بی بی کے سابق شوہرخاور فرید مانیکا نے بالاخر نیا جیون ساتھی چن لیا۔ ان کی نئی دلہن کا نام سمیرا آغا ہے اور ان کی عمر 40 سال ہے۔ خاور مانیکا کے قریبی ساتھی لطیف خان نے ان کی دوسری شادی کی تصدیق کرتے ہوئے بتایا کہ نکاح کی تقریب لاہور میں انجام پائی جس میں قریبی رشتہ داروں اور فیملی فرینڈز نے شرکت کی۔ دوسری جانب ان معاملات سے با خبر ذرائع کا دعویٰ ہے کہ خاور مانیکا کی نئی بیوی، بشریٰ بی بی ہی کا انتخاب ہیں۔ کیونکہ عمران خان کی حالیہ اہلیہ نے خاور مانیکا سے طلاق لیتے ہوئے وعدہ کیا تھا کہ وہ ان کیلئے نیا جیون ساتھی ڈھونڈیں گی۔
واضح رہے کہ بشریٰ بی بی سے عمران خان کی شادی اس لحاظ سے حیرت انگیز واقعہ تھا کہ عمران خان ان سے روحانی مشاورت کرتے تھے۔ ذرائع کے مطابق بشریٰ بی بی المعروف پنکی پیرنی نے عمران خان کو باور کرایا تھا کہ وہ وزیر اعظم اسی صورت میں بن سکیں گے جب بشریٰ بی بی ان کی بیوی ہوں۔ ادھر ’’خوبی قسمت‘‘ دیکھئے کہ عمران خان وزیر اعظم کے عہدے کے قریب پہنچ گئے ہیں اور بشریٰ بی بی خاتون اول بننے والی ہیں۔ ذرائع کا کہنا ہے کہ خاور مانیکا بھی توہم پرست شخصیت کے مالک ہیں۔ وہ اپنی سابقہ بیوی بشری بی بی عرف پنکی پیرنی کے مرید ہیں۔ ان سے پنکی پیرنی نے کہا کہ انہیں ’’بشارت‘‘ ہوئی ہے کہ وہ عمران خان سے نکاح کریں، لہذا انہیں خاور مانیکا کے نکاح سے نکلنا ہوگا۔ خاور مانیکا نے پنکی پیرنی کی ہدایت کے مطابق انہیں اپنے نکاح سے نکال دیا۔ ذرائع کے بقول اس وقت بشریٰ بی بی نے خاور مانیکا سے وعدہ کیا تھا کہ وہ ان کیلئے ایک خوبصورت بیوی تلاش کرکے دیں گی۔
یاد رہے کہ اس سے قبل یہ اطلاعات زیر گردش تھیں کہ بشریٰ بی بی نے اپنے سابق شوہر خاور فرید مانیکا کیلئے ادکارہ نور کی شکل میں نئی بیوی تلاش کر لی ہے۔ رمضان المبارک کے مہینے میں عمران خان اور ان کی اہلیہ بشریٰ بی بی عمرے کی ادائیگی کیلئے سعودی عرب گئے تھے۔جہاں بشری بی بی کی اداکارہ نور کے ساتھ ایک تصویر وائرل ہوئی تھی۔ اس کے بعد سوشل میڈیا پر یہ خبریں گردش کرنے لگ گئی تھیں کہ شاید بشریٰ بی بی اداکارہ نور اور عمران خان کے سیکریٹری عون چوہدری کی دوبارہ شادی کرانا چاہتی ہیں۔ لیکن تحریک انصاف کے ذرائع کے مطابق بشریٰ بی بی، اداکارہ نور کی شادی عون چوہدری سے نہیں بلکہ اپنے پہلے شوہر خاور مانیکا سے کرانا چاہتی تھیں۔ اس کے بعد سوشل میڈیا پر بشریٰ بی بی کے سابق خاوند خاور مانیکا اور اداکارہ نور کی متوقع شادی کی خبر وائرل ہوگئی کہ چیئرمین تحریک انصاف عمران خان کی بیوی نے اپنے سابق شوہر خاور فرید مانیکا کیلئے ادکارہ نور کی شکل میں دوسری بیوی تلاش کر لی ہے۔ جب یہ خبریں گردش کررہی تھیں تو اس وقت عون چوہدری اور نور نے کوئی تبصرہ نہیں کیا۔ یاد ہے کہ نور ایک لمبے عرصے تک شوبز انڈسٹری کا حصہ رہیں۔ تاہم کچھ عرصہ قبل انہوں نے اپنا حلیہ تبدیل کرتے ہوئے حجاب لینا شروع کر دیا تھا۔ سوشل میڈیا پر یہ خبریں بھی گردش کرتی رہی تھیں کہ اداکارہ نور میں اس قدر تبدیلی کے پیچھے بھی بشریٰ بی بی کا ہاتھ ہے۔ نور کے نکاح کے پروگرام کی خبریں جب اچھی طرح پھیل گئیں تو پھر یہ اطلاعات آئیں کہ نو ر کو خاور مانیکا میں کوئی دلچسپی نہیں۔ ذرائع کا کہنا ہے ایک محفل میںبات کرتے ہوئے نور بخاری پھٹ پڑیں اور انہوں نے کہا کہ میں جب شادی کرنا چاہوں گی، ان صاحب سے ضرور مشورہ کروں گی جو میرے حوالے سے ایسی اوٹ پٹانگ خبریں پھیلا رہے ہیں۔ نور کا کہنا تھا کہ آپ کم از کم میری کلاس تو دیکھیں۔ میں اپنی زندگی میں بہت پرسکون ہوں الحمدللہ اور ہمیشہ پرسکون ہی رہنا چاہتی ہوں۔
خاور مانیکا کا پس منظر سیاسی ہے۔ وہ سابق وفاقی وزیر میاں غلام محمد مانیکا کے صاحبزادے ہیں۔ ان کے دیگر بھائیوں میں احمد رضا مانیکا، فاروق احمد مانیکا اور معظم محمود مانیکا اور ایک بہن ہیں۔ جنوری 2018ء میں 80 سال کی عمر میں خاور کی والدہ کا انتقال ہوا تھا۔ ان کی والدہ کا تعلق جالندھر کے پٹھان خاندان سے تھا جو 1947ء میں ہجرت کرکے پاکستان آیا۔ ان کے والد محمد احمد خان پاکستان بننے سے پہلے بھوپال ہائی کورٹ کے چیف جسٹس تھے۔ مرحومہ کے بڑے صاحبزادے خاور فرید مانیکا سینئر سرکاری افسر رہ چکے ہیں۔ جبکہ احمد رضا مانیکا نے 2013ء کے عام انتخابات میں حصہ لیا تھا لیکن کامیاب نہیں ہوسکے تھے، تاہم مقامی سیاست میں کافی فعال ہیں۔ جبکہ مرحومہ کی اکلوتی صاحبزادی سابق ڈی جی آئی بی میاں اسلم حیات مانیکا کی بہو ہیں۔ ٭
٭٭٭٭٭