رینجرز آپریشن میں 3گینگ وار کارندوں 10ملزم گرفتار-اسلحہ و منشیات برآمد

کراچی (اسٹاف رپورٹر) رینجرز نے مختلف علاقوں میں لیاری گینگ وار کے 3کارندوں سمیت 10ملزمان کو گرفتار کرکے اسلحہ، گولہ بارود، مسروقہ سامان اور منشیات برآمد کرلی۔ پولیس نے کینٹ اسٹیشن کے قریب خاتون کے قتل میں ملوث جیب کترےکو دھر لیا۔ تفصیلات کے مطابق رینجرز نے سعیدآباد میں کارروائی کرکے لیاری گینگ وار کے ملزم عمران، شہزاد اور عدنان کو گرفتار کرلیا، ملزمان گٹکے کے کاروبار میں ملوث تھے۔ گڈاپ، ابراہیم حیدری اور فیروز آباد کے علاقوں میں رینجرز کارروائیوں کے دوران 6ملزمان غلام حیدر، عثمان احمد عرف عثمان کالا، ذاکر، آیان علی، دانش اور راحیل اعجاز پکڑے گئے، جو ڈکیتی اور اسٹریٹ کرائم کی متعدد وارداتوں میں ملوث ہیں۔ شارع فیصل پر رینجرز کارروائی میں منشیات فروش اور اسٹریٹ کرائم میں ملوث ملزم محمد شہباز عرف منا پکڑا گیا۔ ملزمان سے اسلحہ، گولہ بارود، مسروقہ سامان اور منشیات بھی ملا ہے۔ فریئر پولیس نے کینٹ اسٹیشن کے قریب کارروائی کرکے گوپانگ جیب کترے گروہ کے کارندے وحید حسین گوپانگ ولد اللہ جوایو خان کو گرفتار کر کے اسلحہ برآمد کر لیا۔ پولیس کے مطابق ملزم 5اپریل 2018کو خیر پور میں آسیہ نامی خاتون کو قتل کر کے کراچی میں روپوش ہوگیا تھا۔ ملزم کیخلاف تھانہ کوٹ دیجی میں مقدمہ درج ہے۔