ریٹائرڈ ڈی ایس پی کے بنگلے سمیت 4 گھروں کاصفایا

کراچی (اسٹاف رپورٹر) شہر کے پوش علاقوں میں جرائم کی وارداتوں میں بے تحاشہ اضافہ ہوگیا، مسلح ملزمان ریٹائرڈ ایس پی سمیت 4گھروں میں لوٹ مارکرکے فرار ہوگئے۔ عید قرباں کے قریب آتے ہی جانور چوری کی وارداتوں میں اضافہ ہوگیا، جانور چوری کی سی سی ٹی وی فوٹیج منظر عام پر آنے کے باوجود بھی پولیس ملزمان کو گرفتار کرنے میں ناکام ہے۔تفصیلات کے مطابق ضلع جنوبی کے مختلف علاقوں میں مسلح ملزمان ریٹائرڈ ایس پی اللہ بخش سمیت 4گھروں سے غیر ملکی کرنسی اور لاکھوں روپے لوٹ کر فرار ہوگئے۔ وارداتیں درخشاں، ساحل اور گذری تھانوں کے علاقے میں ہوئیں، ملزمان مسلح حالت میں گھروں کی دیواریں پھلانگ کر اندر داخل ہوتے ہیں اور کارروائی کے بعد باآسانی علاقے سے فرار ہوجاتے ہیں، درخشاں میں گزشتہ رات5 ڈکیت بنگلے میں گھسے اور 1500ڈالرز اور نقدی لوٹ کر فرار ہوگئے۔ عید الاضحی کے قریب آتے ہی شہر میں قربانی کے جانوروں کی چوری کی وارداتوں میں اضافہ ہوگیا ہے، گزشتہ روز سولجر بازار کے علاقے غفوریہ مسجد کے قریب بکرا چوری کی منظر عام پر آنیوالی سی سی ٹی وی فوٹیج میں دیکھا جاسکتا ہے کہ کم عمر لڑکے نے کس مہارت کے ساتھ واردات انجام دی۔ دوسری جانب سمن آباد کے علاقے انچولی سے موٹر سائیکل چور چند سیکنڈ میں کار لے اڑے، 12 اگست کو ہونے والی واردات کی سی سی ٹی وی فوٹیج میں دیکھا جا سکتا ہے کہ موٹر سائیکل پر آئے 2 ملزمان میں سے ایک باآسانی کار کا دروازہ کھول کر گاڑی میں بیٹھا ،اسٹیئرنگ لاک کے باوجود ملزم انتہائی ہوشیاری سے چند ہی سیکنڈ میں گاڑی اسٹارٹ کرکے فرار ہوگیا۔