متحدہ لندن کے 2 خطرناک ٹارگٹ کلر پکڑے گئے

کراچی(اسٹاف رپورٹر)پولیس نے متحدہ لندن کے 2 خطرناک ٹارگٹ کلر پکڑے لئے۔ٹارگٹ کلرز نے متعدد افراد مارنے کا اعتراف کیا، جن میں سنی تحریک کے 4 کارکنان شامل ہیں۔پولیس اور رینجرز نے دیگر علاقوں سے 19 ملزمان سمیت 44 ملزمان کو بھی دھرلیا ہے۔تفصیلات کے مطابق آرام باغ پولیس نے متحدہ لندن کے 2 ٹارگٹ کلرز جنید عرف جمی اور طاہر احمد عباسی کو گرفتار کرکے اسلحہ برآمد کرلیا۔پولیس کے مطابق گرفتار دہشت گرد متحدہ لندن سرجانی سیکٹر کے سابقہ انچارج عادل کی ٹارگٹ کلنگ ٹیم کا حصہ ہیں۔ملزمان قتل، اقدام قتل، بھتہ خوری اور فائرنگ کی متعدد وارداتوں میں ملوث ہیں اور دوران تفتیش متعدد افراد کی ٹارگٹ کلنگ کا بھی اعتراف کیا ہے۔ملزم طاہر احمد نے دوران تفتیش بتایا کہ 2011 میں ملزم نے اپنے ساتھی اعظم کے ساتھ مل کر سرجانی سیکٹر ڈی الیون میں ہوٹل پر بیٹھے سنی تحریک کے 2کارکنوں ، 2012میں ملزم نے اپنے ساتھی ریحان کالا کے ساتھ مل کر شان عرف لمبا کی ہدایت پر سنی تحریک کے کارکن آصف کے بھائی، 2012میں ہی ملزم نے پاور ہائوس کے قریب سنی تحریک کے کارکن، 2014میں ملزم نے اپنے ساتھی اعظم کے ساتھ مل کر سرجانی سیکٹر ایل ون میں اکرم نامی شخص ،جبکہ ملزم نے 2015میں اپنے ساتھیوں عمران کالا اور اعظم کے ساتھ مل کر جانی نامی اسٹیٹ ایجنٹ کو فائرنگ کرکے ہلاک کیا تھا۔ پولیس کے مطابق دوران تفتیش ملزم نے مزید اعتراف کیا کہ 2016میں ملزم نے اپنے دیگر ساتھیوں جنید جمی اور سیکٹر انچارج عادل کے ساتھ مل کر امجد نامی شخص کو فائرنگ کر کےہلاک کیا، جس کا مقدمہ الزام نمبر 129/16ملزم کے خلاف تھانہ سرجانی میں درج ہے۔پولیس نے ملزمان کے خلاف دو الگ الگ مقدمات درج کرلیے۔رینجرز نے سولجر بازار، ملیر سٹی اور کورنگی میں کارروائی کرکے 4ملزمان نعمان احمد، احسان اعوان، انور زیب، عظیم خان اور جمشید کوارٹر میں کارروائی کرکے جرائم پیشہ عبدالواحد کو گرفتار کرلیا۔ فیروز آباد پولیس نے 6ملزمان دانش، رضا خان، شریف، نور کلیم، ذاکر کو گرفتار کرکے 6پستول، ایک نائن ایم ایم، ایک آوان بم، موٹر سائیکل برآمد کرلی۔پیر آباد پولیس نے 4ملزمان سید شاہد دین ،ذیشان ،عثمان غنی، عمران ، اتحاد ٹاؤن پولیس نے ملزم فرمان، کرایہ داری ایکٹ کے تحت اورنگزیب، ماڑی پور پولیس نے ملزم جمیل بلوچ ،سپر مارکیٹ پولیس نے 2 ملزمان نعمان، سلمان، سعود آباد پولیس نے ملزم عارف، چاکیواڑہ پولیس نے ملزم دانش علی،بریگیڈ پولیس نے لائنز ایریا سے 2منشیات فروشوں رضا، دلشاد خان ، درخشاں پولیس نے موٹر سائیکل لفٹر عرفان، پیر آباد پولیس نے مفرور ملزم وسیم اکرم، شاہ فیصل کالونی پولیس نے مفرور ملزم نیاز ، الفلاح پولیس نے4مفرور ملزمان ضیااللہ ،نوید،حسین لاہوتی، عبدالحکیم ، اورنگی ٹاؤن پولیس نے مفرور ملزم وسیم ، سائٹ سپر ہائی وے پولیس نے 2مفرور ملزمان لیاقت مغیری، عین الدین ، ابراہیم حیدری پولیس نے4مفرور ملزمان شوکت،اللہ داؤد، غلام ، نذیر،ملیر سٹی پولیس نے مفرور ملزم صمد،بن قاسم پولیس نے 3مفرور ملزمان آصف،اشفاق،ذوالفقار علی، کھارادر پولیس نے مفرور ملزمہ شمع پروین اور ساتھی الطاف کو گرفتار کرلیا۔