ایشین گیمز مینز فیلڈ ہاکی ٹورنامنٹ کا آغاز آج ہو گا

جکارتہ(امت نیوز)اٹھارہویں ایشین گیمز مینز فیلڈ ہاکی ٹورنامنٹ کا آغاز (آج) پیر سے ہو گا، پاکستانی ٹیم تھائی لینڈ کے خلاف میچ سے مہم کا آغاز کرے گی۔ انڈونیشیا میں جاری میگا گیمز ہاکی ٹورنامنٹ آج پیر سے شروع ہو گا جس میں ایشیا کی 12 ٹیمیں طلائی تمغے کے حصول کیلئے ایکشن میں دکھائی دیں گی، ٹیموں کو دو مختلف گروپس میں تقسیم کیا گیا ہے، گروپ اے میں بھارت، جنوبی کوریا، جاپان، سری لنکا، ہانگ کانگ اور انڈونیشیا جبکہ گروپ بی میں پاکستان، ملائیشیا، بنگلہ دیش، اومان، تھائی لینڈ اور قازقستان شامل ہیں، پاکستانی ٹیم آج پیر کو ابتدائی میچ میں تھائی لینڈ کے مدمقابل ہو گی، گرین شرٹس ایونٹ میں اپنا دوسرا میچ 22 اگست کو اومان، تیسرا میچ 24 اگست کوقازقستان ، چوتھا میچ 26 اگست کو ملائیشیا جبکہ پانچواں اور آخری میچ 28 اگست کو بنگلہ دیش کے خلاف کھیلے گی۔