کیریبین لیگ میں ہٹمائر کی شاندار سنچری

لوڈرہل(امت نیوز)کیریبین پریمیئر لیگ میں شمرون ہٹمائر کی شاندار سنچری اور شعیب ملک کی نصف سنچری کی بدولت گیانا امیزن واریرز نے تین فتوحات کے ساتھ پوائنٹس ٹیبل پر ٹاپ پوزیشن حاصل کر لی، فاتح ٹیم نے جمیکا تلاواز کو 71 رنز سے شکست دی، تلاواز کی ٹیم 209 رنز کے ہدف کے تعاقب میں 16.2 اوورز میں 138 رنز پر ڈھیر ہو گئی، ہٹمائر کو عمدہ بلے بازی کا مظاہرہ کرنے پر میچ کے بہترین کھلاڑی کا ایوارڈ دیا گیا۔ سی پی ایل کے سلسلے میں کھیلے گئے گیارہویں میچ میں گیانا امیزن واریرز نے پہلے کھیلتے ہوئے مقررہ اوورز میں 7 وکٹوں پر 209 رنز بنائے، ہٹمائر نے جارحانہ بلے بازی کا مظاہرہ کرتے ہوئے حریف بائولرز کی خوب دھنائی کی اور سنچری سکور کی، وہ 100 رنز بنا کر ٹاپ سکورر رہے۔