فائیو اسٹار چورنگی اور شاہراہ قائدین پر مقابلے میں 3ملزم ہلاک

کراچی (اسٹاف رپورٹر)عید الاضحی کے پہلے اور دوسرے روز نارتھ ناظم آباد فائیو اسٹار چورنگی اور شاہراہ قائدین پر پولیس نے مقابلے کے بعد تین ملزمان کو ہلاک اور ایک ملزم کو گرفتار کرلیا۔عیدالاضحی کے پہلے روز نارتھ ناظم آباد تھانے کی حدود فائیواسٹار چورنگی کے قریب ایک موٹر سائیکل پر سوار دو مسلح ملزمان اسلحہ کے زور پر لوٹ مار کررہے تھے کہ گشت پر مامور پولیس موبائل موقع پر پہنچ گئی۔ ملزمان نے پولیس کو دیکھتے ہی اندھا دھند فائرنگ شروع کردی اور موقع سے فرار ہونے لگے پولیس کی جوابی فائرنگ سے ایک ملزم موقع پر ہلاک جبکہ دوسرے ملزم کو پولیس نے گرفتار کرکے اسلحہ اور موٹر سائیکل برآمد کرتے ہوئے ہلاک ہونے والے ملزم کی لاش کو اسپتال پہنچایا۔پولیس کا کہنا ہے کہ ہلاک ہونے والے ملزم کی شناخت 25سالہ اویس حسین جعفری کے نام سے ہوئی۔ ایڈیشنل آئی جی کراچی امیر شیخ نے پولیس پارٹی کے لیے ایک لاکھ روپے نقد انعام کا اعلان کیا ہے۔عید الاضحیٰ کے دوسرے فیروزآباد کے علاقے شاہراہ قائدین پر ایک موٹر سائیکل پر دو افراد اسلحہ کے زور پر شہریوں سے لوٹ مار کررہے تھے کہ گشت پر مامور پولیس موبائل موقع پر پہنچی تو ملزمان نے پولیس کو اپنی طرف آتے دیکھ کر فائرنگ شروع کردی اور موقع سے فرار ہونے لگے پولیس کی جوابی فائرنگ سے دونوں ملزمان زخمی ہوگئے جن کو فوری طور پر قریبی اسپتال پہنچایا ، جہاں دوران علاج زخموں کی تاب نہ لاتے ہوئے دونوں ملزمان نے دم توڑ دیا ، پولیس کا کہنا ہے کہ ہلاک ہونے والے دونوں ملزمان کی شناخت محمد عرفان اور نورحسین کے نام سے ہوئی۔ایڈیشنل آئی جی کراچی نے پولیس پارٹی کے لیے ایک لاکھ روپے انعام کا اعلان کیا ہے۔