مغوی ڈرائیور کو بلوچستان منتقل کرنے کی کوشش ناکام

کراچی (اسٹاف رپورٹر) منگھوپیر پولیس نے مغوی ٹینکر ڈرائیور بازیاب کرکے بلوچستان منتقل کرنے کی کوشش ناکام بنا دی جبکہ اغوا کار فرار ہو گئے۔ تفصیلات کے مطابق منگھو پیر پولیس نے رات گئے کارروائی کر کے ناردرن بائی پاس درگاہ ماہی گاڑھی سے مغوی ٹینکر ڈرائیور کوبازیاب کرالیا جسے اغوا کار بلوچستان منتقل کرنے کی کوشش کر رہے تھے ۔ چوکی انچارج ہمدرد رانا تسلیم کے مطابق تیز رفتار ٹینکر کو رکنے کا اشارہ کیا نہ رکنے پر پولیس نے ٹینکر کا تعاقب کیا۔اس دوران ندی کے قریب کچے میں ٹینکر پھنس گیا ۔جس پرنا معلوم ملزمان ٹینکر چھوڑ کر فرار ہوگئے، ٹینکرمیں ہاتھ پاوں بندھے محمد ابراہیم کو بازیا ب کرایا۔پولیس ابراہیم سے ملزمان سے متعلق معلومات حاصل کررہی ہے۔