شہری پر تشدد کے الزام میں ایس پی کا گارڈ اور ڈرائیور گرفتار

کراچی (اسٹاف رپورٹر)پارکنگ ایریا میں گاڑی کھڑی کرنے پر ایس پی ثاقب ابراہیم کے عملے نے شہری کو تشدد کر کے زخمی کر دیا ہے ۔تشدد کی ویڈیو فوری وائرل ہونے پر پولیس بھی متحرک ہو گئی ۔تھانہ فیروز آباد نے پولیس افسر کےڈرائیور شفیق اور گن مین ناصر کو حراست میں لے لیا ہے ۔زخمی شہری کی میڈیکل رپورٹ ملنے کے بعد مقدمہ درج کیا جائے گا ۔ اطلاعات کے مطابق پیر کی شب ایس پی ثاقب ابراہیم کی گاڑی خالد بن ولید روڈ پر واقع ایک رہائشی بلڈنگ کی پارکنگ میں داخل ہونے لگی تو پہلے سے موجود گاڑی کی وجہ سے راستہ نہ ملنے پر پولیس گارڈو ڈرائیور کی اسٹیڈیم روڈ کے رہائشی اور کار سوار اویس سےتلخ کلامی ہوگئی جو بعد میں تشدد پر منتج ہوئی ۔اہلکاروں کے تشددکی موقع پر موجود لوگوں نے ویڈیو بنا کر سوشل میڈیا پر پوسٹ کر دی جو فوری وائرل ہو گئی ۔اطلاع ملنے پرعلاقہ پولیس بھی موقع پر پہنچ گئی جس کے مطابق واقعے کے مطابق طبیعت کی خرابی کی وجہ سےڈاکٹر کو دکھا کر گھر لوٹنے والے ایس پی ثاقب ابراہیم گاڑی کی سیٹ پر ہی لیٹے ہوئے تھے۔