بھارتی فوج نے 2 کشمیری شہید کر دیئے – ہزاروں افراد کا احتجاجی مظاہرہ

سری نگر(مانیٹرنگ ڈیسک) بھارتی فوج نے ریاستی دہشت گردی کا مظاہرہ کرتے ہوئے مقبوضہ کشمیر میں مزید 2 نوجوانوں کو شہید کردیا۔کشمیر میڈیا سروس کے مطابق بھارتی فوج نے ضلع اسلام آباد (اننت ناگ) کے علاقے منورد میں سرچ آپریشن کے دوران دو نوجوانوں کو شہید کردیا۔ شہدا کی شناخت الطاف کشرو اور عمر رشید کے نام سے ہوئی۔ قابض فوج نے اسی علاقے میں ایک گھر کو بھی بارودی مواد نصب کرکے تباہ کردیا۔ بھارتی حکام نے دعویٰ کیا کہ دونوں نوجوانوں کا تعلق حزب المجاہدین سے تھا۔کٹھ پتلی انتظامیہ نے ضلع میں عوام کو ایک دوسرے سے رابطے سے روکنے کےلیے انٹرنیٹ اور موبائل فون سروس معطل کردی جبکہ ٹرینیں بھی روک دی گئیں تاکہ بے گناہ نوجوانوں کی شہادت کے خلاف احتجاج نہ کیا جاسکے۔ تمام تر پابندیوں اور قدغنوں کے باوجود کشمیری عوام ہزاروں کی تعداد میں گھروں سے نکل آئے اور بھارت کے خلاف شدید احتجاج کیا۔ قابض افواج نے مظاہرین کو منتشر کرنے کیلئے آنسو گیس کی شیلنگ کی اور لاٹھی چارج کیا۔ ادھر کپواڑہ میں بھارتی فوج کے ہیڈکوارٹرز میں لگنے والی آگ سے شدید نقصان پہنچا۔ فوج کی متعدد بیرکس جل کر راکھ ہوگئیں جبکہ اسلحہ اور ایندھن کا بڑا ذخیرہ بھی تباہ ہوگیا۔ دوسری جانب بھارت کی خفیہ ایجنسی نے کشمیریوں کی جدوجہد آزادی کی حمایت کرنے کے الزام میں جموں جیل کے ڈپٹی سپرینٹنڈنٹ فیروز احمد لون اور اسحاق پالا نامی کشمیری کو گرفتار کرلیا۔