بلدیہ ٹائون میں شوہر نے بیوی مار ڈالی -ملزم آلہ سمیت گرفتار

کراچی(اسٹاف رپورٹر) بلدیہ ٹائون میں گھریلو جھگڑ ے کے دوران شوہر نے بیوی کو چھریوں کے وار کرکے قتل کردیا۔پولیس نے ملزم کو آلہ قتل سمیت گرفتار کرلیا۔ تفصیلات کے مطابق اتحاد ٹائون کے علاقے بلدیہ ٹائون سیکٹر 9/E پکوڑا چوک گرجا گھر کے قریب رہائش پذیر نعیم نامی شخص نے جھگڑے کے بعد اپنی بیوی 35سالہ کہکشاں پر چھری کے پے در پے وار کیے ، جس سے وہ شدید زخمی ہوگئی۔ شور سن کر علاقہ مکین موقع پر پہنچ گئے اور ملزم کو پکڑ کر زخمی خاتون کو فوری طورپر طبی امداد کیلئے سول اسپتال پہنچایا، جہاں وہ دوران علاج زخموں کی تاب نہ لاتے ہوئے چل بسی ۔ واقعے کی اطلاع ملتے ہی پولیس نے پہنچ کر ملزم نعیم کو آلہ قتل سمیت گرفتار کرلیا۔