کلفٹن گیسٹ ہاوس سے اداراکار ساتھی سمیت گرفتار – شراب برآمد

کراچی (اسٹاف رپورٹر) کلفٹن پولیس نے گیسٹ ہاؤس پر چھاپے کے دوران معروف اداکار کو دوست سمیت گرفتار کر کے شراب برآمد کرلی۔ پولیس نے دونوں ملزمان کیخلاف الگ الگ مقدمات درج کرلئے۔ ایس ایس پی کا کہنا ہے کہ ملزمان نشے کی حالت میں گرفتار ہوئے تھے، جس کی تصدیق میڈیکل ٹیسٹ میں ہوگئی۔ تفصیلات کے مطابق کلفٹن پولیس نے منگل و بدھ کی درمیانی شب خفیہ اطلاع پر بلاک 5 میں واقع گیسٹ ہاؤس پر چھاپہ مار کر ایک کمرے سے معروف اداکار علی سلیم المعروف بیگم نوازش علی اور عتیق الرحمان کو گرفتار کر کے کمرے سے ممنوعہ اشیا اور شراب کی 2 بوتلیں برآمد کر لیں۔ پولیس نے ملزم علی سلیم کیخلاف منشیات ایکٹ کے تحت مقدمہ نمبر 222/18 اور ملزم عتیق الرحمٰن کیخلاف نیشنل ایکشن پلان کے تحت مقدمہ نمبر 223/18 درج کر کے انہیں میڈیکل ٹیسٹ کیلئے اسپتال منتقل کردیا۔ ایس ایس پی جنوبی عمر شاہد حامد نے بتایا کہ ملزم علی سلیم کی میڈیکل رپورٹ مثبت آئی ہے اور وہ گرفتاری کے وقت نشے میں تھا۔ بعد ازاں ملزمان کو جوڈیشل مجسٹریٹ جنوبی کی عدالت میں پیش کیا گیا، جہاں عدالت نے علی سلیم عرف بیگم نوازش علی اور عتیق الرحمان کو 10،10 ہزار کے مچلکے جمع کرانے کا حکم دیتے ہوئے ضمانت منظور کر لی۔ اس موقع پر ایک صحافی نے سوال کیا کہ گرفتاری کے وقت اداکارہ میرا بھی آپ کیساتھ تھی؟ تو علی سلیم نے سر ہلا کر ہاں میں جواب دیا، پھر ان سے سوال کیا گیا کہ میرا کو پولیس نے گرفتار کیوں نہیں کیا، جس کا انہوں نے کوئی جواب نہیں دیا۔