حوثی میزائل کے ٹکڑے گرنے سے 26 سعودی زخمی

ریاض( امت نیوز/ ایجنسیاں)سعودی عرب کی فضائی ڈیفنس فورس نے یمن کے حوثی باغیوں کی طرف سے داغا گیا ایک بیلسٹک میزائل نجران کی فضا میں تباہ کردیا تاہم اس کارروائی کے دوران2 بچوں سمیت26سعودی شہری زخمی ہوگئے۔عرب ٹی وی کے مطابق عرب فوجی اتحادکے ترجمان کرنل ترکی المالکی نے بتایا کہ حوثیوں کی طرف سے صعدہ شہرسے ایک بیلسٹک میزائل سعودی عرب کے شہر نجران پر داغا گیا۔ سعودی عرب کے پیٹریاٹ میزائلوں نے خود کار کارروائی کرکے بیلسٹک میزائل فضا ہی میں تباہ کردیا تاہم اس کے ٹکڑے آبادی پر آ گرے جس کے نتیجے میں26 شہری زخمی ہوگئے۔ ان کی حالت خطرے سے باہر ہے۔دوسری جانب حوثیوں نے دعویٰ کیا ہے کہ میزائل سعودی نیشنل گارڈ کیمپ کو نشانہ بنانے کیلیے داغا گیا تھا۔