پولیس موبائل نے کلفٹن میں فخر عالم کی گاڑی کو ٹکر ماردی

کراچی (اسٹاف رپورٹر) کلفٹن میں بااثر شخص کے پروٹوکول پر مامور پولیس موبائل نےمعروف گلوکارفخرعالم کی گاڑی کوعقب سے ٹکر مار دی ۔ تفصیلات کے مطابق گلوکار فخر عالم نے میڈیا کوبتایا کہ حادثے کے بعد کلاشنکوف بردار اہلکار مجھے ہراساں کرتے رہےتمام اہلکار شلوار قمیض میں ملبوس اور کلاشنکوفوں سے لیس تھے۔فخرعالم نے کہا کہ گذشتہ روز میں کلفٹن سے اپنے دوستوں کے ساتھ جا رہا تھاسڑک پر رش ہونے کی وجہ سے گاڑیاں آہستہ چل رہی تھی کہ اچانک میری گاڑی کو پولیس موبائل نمبر SPE154نے زور سے ٹکرماری ،فخرعالم کا اپنے موقف میں کہنا تھا کہ ایک اہلکار اتر کر آیا اور مجھ سے گاڑی آگے کرنے کیلئے دباؤ ڈالنے لگا،جب زیادہ شور شرابہ کیا تو میں کار سے اترکر باہر آگیا اور وڈیو بنانی شروع کی، گلوکار نے کہا کہ پولیس اہلکار مجھے دیکھتے ہی پہچان گئے اور ان کا لہجہ اور باڈی لینگوئج تبدیل ہوگئی۔ بعد ازاں جس شخص کے پروٹوکول پر وہ اہلکار تعینات تھے وہ موقع سے فرارہوگیافخر عالم نے سوال کیا کہ کیا ایک عام شہری کی یہ عزت ہے کہ اس کی سڑک پر تذلیل کی جائے۔فخر عالم نے واقعہ کے حوالے سے پولیس سے کوئی رابطہ نہیں کیا ہے اور نہ ہی پولیس اہلکاروں کے خلاف کوئی مقدمہ درج کروایا ہے۔