ابراہم ڈی ویلیئرز کی پی ایس ایل فور میں شمولیت کا باضابطہ اعلان

دبئی (امت نیوز) جنوبی افریقہ کے لیجنڈری بلے باز ابراہم ڈی ویلیئرز آئندہ برس پاکستان سپر لیگ میں ایکشن میں نظر آئیں گے۔ اس حوالے سے پاکستان سپر لیگ کے ٹوئٹر اکاؤنٹ پر گزشتہ روز باضابطہ اعلان کیا گیا۔ رواں سال بین الاقوامی کرکٹ سے ریٹائرمنٹ کا اعلان کرنے والے ڈی ویلیئرز نے انٹرنیشنل کیرئیر میں 20 ہزار سے زائد رنز بنا رکھے ہیں۔ پی ایس ایل میں شرکت کی تصدیق کرتے ہوئے ڈی ویلیئرز نے ایک ویڈیو پیغام میں کہا کہ پاکستان سپر لیگ اب دنیا کی بہترین ٹی ٹونٹی ٹورنامنٹ بن چکی ہے اور میں گزشتہ برسوں کے دوران پی ایس ایل کے میچوں سے کافی محظوظ ہوا ہوں۔ اے بی ڈی ویلیئرز پی ایس ایل 2019 کے ڈرافٹس میں سب سے بڑی شمولیت ہوں گے۔اپنے پیغام میں ڈی ویلیئرز نے پاکستانی شائقین کا بھی شکریہ ادا کیا۔پاکستان کرکٹ بورڈ کے سربراہ احسان مانی نے ڈی ویلیئرز کو خوش آمدید کہتے ہوئے کہا کہ ڈی ویلیئرز دور حاضر کے عظیم کھلاڑی ہیں اور ان کی شرکت سے ٹورنامنٹ کی اہمیت میں اضافہ ہوگا۔ انہوں نے کہا کہ ہم ڈی ویلیئرز کو پاکستان سپر لیگ میں سائن کرنے پر بہت پرجوش ہیں۔