بہاالدین زکریایونیورسٹی میں طالبعلم پر بدترین تشدد

ملتان (مانیٹرنگ ڈیسک)بہاالدین زکریا یونیورسٹی میں طلبا تنظیموں کے جھگڑے کے دوران ایک نہتے طالب علم کو بدترین تشدد کا نشانہ بنایا گیا۔نجی ٹی وی پرنشرہونے والی ویڈیو میں دیکھا جاسکتا ہے کہ ایک تنظیم کے 20 سے 25 افراد نے ہاسٹل کے کمرے میں گھس کر حریف تنظیم کے نہتے طالب علم پر تشددکیا۔ گزشتہ ایک ماہ سے2طلبہ تنظیموں کے درمیان ہاسٹلز کے معاملات پر جھگڑے جاری تھے۔مذکورہ وڈیو گزشتہ پیر کی ہے جس میں دیکھا جاسکتا ہے کہ حملہ آوروں نے ہاسٹل میں گھس کر توڑ پھوڑ کی اور وہاں موجود چیزوں کو نقصان پہنچایا۔ یونیورسٹی انتظامیہ کا موقف ہے کہ آج چھٹی کی وجہ سے معاملہ رکا ہوا ہے، پیرکو اس حوالے سے انکوائری ہوگی۔ملتان پولیس کا کہنا ہے کہ جھگڑے کا علم نہیں، یونیورسٹی انتظامیہ تحریری طور پر آگاہ کرے تو کارروائی کریں گے۔دوسری جانب وزیراعلیٰ پنجاب عثمان بزدار نے طالب علم پر تشدد کے واقعے کا نوٹس لیتے ہوئے سی پی او ملتان سے رپورٹ طلب کرلی۔ وزیراعلیٰ نے ہدایت کی ہے کہ ذمہ داروں کے خلاف قانون کے تحت کارروائی کی جائے۔