درجن بھرافراد خاتون کو اغوا کرکے لے گئے

کراچی(اسٹاف رپورٹر)کورنگی صنعتی ایریا سے مبینہ طور پر درجن سے زائد ملزمان خاتون کو اغوا کر کے فرار ہو گئے۔ کورنگی صنعتی ایریا کے علاقے سیکٹر 7Aبلال کالونی گلزارموڑ کے قریب سے کار اور سوزوکی میں سوار درجن سے زائد افراد نے سوزوکی میں سوار خاتون 30سالہ رابعہ زوجہ عبدالغفور کو اتارا اور اغوا کر کے فرار ہو گئے ،مغویہ کے شوہر عبدالغفور نے تھانے میں مقدمہ نمبر 756/18زیر دفعہ 365/34درج کرواتے ہوئے4ملزمان یار محمد ،حنیف،غلام ،گل حسن سمیت 12 نامعلوم افراد کو نامزد کروایا ہے۔ مغویہ کے شوہر نے اپنے بیان میں کہا کہ ہم میاں بیوی اور سالی کے ساتھ اسپتال میں چیک اپ کروانے کے بعد اپنے گھر حاجی ابراہیم پہنور گوٹھ جارہے تھے کہ اچانک 2گاڑیوں نے ہمارا راستہ روک لیا اور میری بیوی کو اتارنے کے بعد اغوا کرکے فرار ہو گئے۔ پولیس کے مطابق واقعہ پراسرار ہے ،کیونکہ شوہر نے واردات کا 2 مختلف وقت بتایا ہے ،جبکہ اس نے 4افراد کو نامزد بھی کیا ہے۔ مغویہ کا تعلق لاڑکانہ سے ہے اور ان کی خاندانی دشمنی بھی چل رہی ہے ،خدشہ ہے کہ واردات تنازعے کا شاخسانہ نہ ہو۔