سچل کے علاقے میں مسلح افراد سرکاری گاڑی چھین کر فرار

کراچی (اسٹاف رپورٹر) سچل کے علاقے سے 3 مسلح ملزمان سرکاری گاڑی چھین کر فرار ہوگئے، پولیس کے مطابق گاڑی ڈرائیور چلارہا تھا، پولیس نے واقعہ کا مقدمہ درج کرکے گاڑی کی تلاش شروع کردی۔ تفصیلات کے مطابق سچل کے علاقے سچل گوٹھ میں گلی نمبر 1 سے کار میں سوار تین مسلح ملزمان اسلحہ کے زور پر سرکاری گاڑی نمبر GSC-748ٹویوٹا کرولا چھین کر فرار ہوگئے، ڈیوٹی افسر سکندر نے بتایا کہ چھینی گئی گاڑی ذوالفقار نامی شخص کی تھی جو کہ سندھ اسمبلی میں ملازم ہے۔واقعہ کے وقت گاڑی ڈرائیور فرحان چلا رہا تھا، پولیس کے مطابق ڈرائیور نے ابتدائی بیان میں بتایا ہے کہ وہ اپنے دوست کے پاس ملنے کے لئے آیا تھا کہ آلٹو کار میں سوار تین افراد جن کے ہاتھ میں ٹی ٹی پستول تھے اسلحہ کے زور پر گاڑی چھین کر فرار ہوگئے، تاہم پولیس نے ڈرائیور فرحان کی مدعیت میں واقعے کا مقدمہ نمبر 479/18درج کرکے گاڑی کی تلاش شروع کردی ہے، واضح رہے کہ گزشتہ روز بھی درخشاں کے علاقے سے میئر کراچی کی گاڑی چھینی گئی تھی۔