تیز رفتار گاڑیوں کی ٹکر سے خاتون سمیت 3افراد جاں بحق

کراچی (اسٹاف رپورٹر) تیز رفتار گاڑیوں کی ٹکر سے خاتون سمیت 3افراد جاں بحق اور 4بچوں سمیت 9افراد زخمی ہو گئے۔ تفصیلات کے مطابق کلری کے علاقے آگرہ تاج کالونی دعا ہوٹل کے قریب تیز رفتار سوزوکی اور رکشے میں خوفناک تصادم ہو گیا، جس کی اطلاع ملتے ہی امدادی ٹیم نےشدید زخمی خاتون، مرد اور 4بچوں کوسول اسپتال منتقل کیا، جہاں50سالہ نعمت بی بی نے دم توڑ دیا۔ پولیس نے بتایا کہ زخمی 4بچوں کی شناخت قمر،عماد اللہ ،آمنہ اور محمد موسی اور رکشہ ڈرائیور کی 30سالہ یونس کے نام سے ہوئی ہے۔ آئی آئی چندریگر روڈ سٹی اسٹیشن کے قریب تیز رفتار کار کی ٹکر سے 2موٹرسائیکلوں پر سوار4 نوجوان شدید زخمی ہو گئے،جنہیں سول اسپتال لایا گیا، جہاں دوران علاج 17سالہ حذیفہ نے دم توڑ دیا۔ میٹھادر پولیس کے مطابق15سالہ بلال،16سالہ علی رضا اور15سالہ اویس زیر علاج ہیں۔ صدر ریگل چوک کے قریب2رکشوں میں تصادم ہوگیا، جس کی اطلاع پر امدادی ٹیم نے 2افراد کو شدید زخمی حالت میں سول اسپتال منتقل کیا۔ جہاں50سالہ نامعلوم شخص نے دم توڑ دیا جبکہ زخمی کی شناخت 45سالہ فضل الرحمن کے نام سے کی گئی۔