امام الحق نے ایشیا کپ کیلئے قومی ٹیم کو جوائن کرلیا

لاہور(امت نیوز) قومی کرکٹ ٹیم کے بلے باز امام الحق نے بدھ کے روز یو اے ای میں ایشیا کپ میں حصہ لینے والی قومی کرکٹ ٹیم کو جوائن کرلیا ۔دوسری جانب قومی کرکٹ ٹیم کے نئے فیلڈنگ کوچ گرانٹ بریڈ برنٹ بھی دبئی پہنچ گئے، انہیں پی سی بی نے حال ہی میں فیلڈنگ کوچ کے عہدے پر تعینات کیا ہے۔ امام الحق یو اے ای کے ویزہ میں تاخیر کے سبب ٹیم کے ہمراہ روانہ نہیں ہوسکے تھے تاہم منگل کے روز انہیں ویزہ مل گیا ۔وہ منگل اور بدھ کی درمیانی شب لاہور سے یو اے ای کے لئے روانہ ہوئے اور بدھ کی صبح ٹیم کو جوائن کرلیا ۔ایشیا کپ کے لیے قومی ٹیم میں سرفراز احمد، فخر زمان، بابراعظم، آصف علی، امام الحق، شعیب ملک، شان مسعود، حارث سہیل و دیگرشامل ہیں۔