کلثوم نواز کی مارشل لادور میں جدوجہد تاریخ کا حصہ رہے گی- خورشید شاہ

سکھر (نمائندہ امت) پیپلز پارٹی کے مرکزی رہنما خورشید شاہ نے بیگم کلثوم نواز کو ایک جدوجہد کا نام قرار دیتے ہوئے ان کے انتقال پر اظہار افسوس کیا ہے اور کہا ہے کہ بیگم کلثوم نواز نے مشرف کے مارشل لاءدور میں جو جدوجہد کی وہ تاریخ کا حصہ رہے گی، جو لوگ ظالمانہ دور سے لڑتے ہیں وہ ہمیشہ تاریخ میں زندہ رہتے ہیں۔ سول اسپتال سکھر کے دورے کے بعد میڈیا سے گفتگو کرتے ہوئے انہوں نے مزید کہا کہ عمران خان نے جو لوگوں سے وعدے کیے ہیں وہ ان کے پاس تک نہیں جارہے، ان کی حکومت نے گیس کی قیمتیں 46 فیصد بڑھا دی ہیں جس سے عوام کو سخت پریشانی کا سامنا کرنا پڑے گا لیکن اس کے باوجود ہم حکومت کو موقع دیں گے کہ وہ کام کرے تاکہ وہ کل یہ نہ بول سکے کہ اس کے کام میں رکاوٹیں ڈالی گئی ہیں۔