فوٹیج سے 40ملزم پکڑے گئے-برقع پوش ڈاکو ساتھی سمیت گرفتار

کراچی (اسٹاف رپورٹر)سرسید پولیس نے لوٹ مار کرنے والے برقع پوش ملزم کو ساتھی سمیت گرفتار کرلیا، جب کہ کراچی پولیس نے ایک ہفتے کے دوران سی سی ٹی وی فوٹیج کی مدد سے 40ملزمان کو دھرلیا ہے۔ تفصیلات کے مطابق سرسید پولیس نے 2ملزمان انیس اور بابر حسین کو گرفتار کر کے اسلحہ موٹر سائیکل برآمد کرلی۔پولیس کا کہنا ہے کہ ملزمان نے 25سے زائد وارداتیں کرنے کا اعتراف کیا ہے۔ملزم انیس اپنے ساتھی بابر حسین کے ساتھ موٹر سائیکل پر برقع پہن کر مختلف علاقوں میں شہریوں کو ایڈریس پوچھنے کے بہانے روکتا اور اسلحہ دکھا کر لوٹ لیتا تھا۔دریں اثنا کراچی پولیس نے سی سی ٹی وی فوٹیج کی مدد سے گزشتہ ایک ہفتے کے دوران ہونے والی 18وارداتوں میں ملوث 40ملزمان کو گرفتار کر کے اسلحہ اور دیگر سامان برآمد کرلیا ہے۔ترجمان نے بتایا کہ ضلع غربی پولیس نے 5وارداتوں میں ملوث 13ملزمان ، ضلع شرقی پولیس نے 3وارداتوں میں ملوث 7ملزمان ،کورنگی ڈسٹرکٹ پولیس نے 3وارداتوں میں ملوث 5ملزمان ،ضلع جنوبی پولیس نے 2وارداتوں میں ملوث 2ملزمان اور اسپیشل انویسٹی گیشن یونٹ نے 3وارداتوں میں ملوث 11ملزمان کو گرفتار کیا جبکہ ضلع وسطی پولیس نے ایک واردات کے 2ملزمان گرفتار کیے ہیں۔تمام ملزمان کو وڈیوز سے شناخت کر کے گرفتار کیا گیا ہے ، جبکہ مدعی مقدمات نے بھی ملزمان کو شناخت کرلیا ہے ۔