ایشین اسنوکر ٹور کیلئے حارث طاہر اور محمد بلال طلب

اسلام آباد(امت نیوز) ایشین کنفڈریشن بلیئرڈ اینڈ سنوکر ایسوسی ایشن (اے سی بی ایس) نے رواں ماہ قطر میں شیڈول پہلے اے سی بی ایس ایشین سنوکر ٹور کیلئے دو پاکستانی کیوئسٹس محمد حارث طاہر اور محمد بلال کو مدعو کر لیا۔ ٹورنامنٹ 26 سے 29 ستمبر تک شیڈول ہے۔ پاکستان بلیئرڈ اینڈ سنوکر ایسوسی ایشن (پی بی ایس اے) کی طرف سے جاری کردہ تفصیلات کے مطابق اے سی بی ایس نے پاکستانی کیوئسٹ حارث طاہر اور محمد بلال کو پہلے ایشین سنوکر ٹور میں شرکت کیلئے دعوت دی ہے، دونوں کھلاڑیوں کی رواں برس ایشین ٹورنامنٹس میں کارکردگی کو مدنظر رکھتے ہوئے ایشین ٹور کیلئے مدعو کیا گیا ہے، حارث طاہر ایشین انڈر21 سنوکر چیمپئن شپ میں رنر اپ رہے تھے جبکہ محمد بلال نے سیمی فائنل کھیلا تھا، محمد بلال جو کہ چھٹی ایشین ٹیم ایونٹ اور ساتویں سکس ریڈ سنوکر چیمپئن شپ میں بھی ملک کی نمائندگی کریں گے۔