سکھر میں علم بجلی تاروں سے ٹکرا گیا- عزا دار جاں بحق

سکھر (نمائندہ امت) پرانا سکھر میں 8 محرم الحرام کے ماتمی جلوس نکالے گئے، ماتمی جلوس میں شامل علم پاک بجلی کے تاروں سے ٹکرانے کے باعث ایک شخص جاں بحق اور دوسرا جھلس کر زخمی ہو گیا۔ جاں بحق ہونے والا شخص ندیم شیخ روہڑی کا رہائشی تھا، جس کی لاش اور زخمی کو سول اسپتال منتقل کردیا گیا۔ واقعہ بجلی کے تار نیچے ہونے کے باعث پیش آیا۔ ماتمی جلوس معصومی امام بارگاہ سے برآمد ہوکر روایتی راستوں سے ہوتا ہوا واپس امام بارگاہ پر اختتام پذیر ہوا۔ ادھر شہداد پور میں درگاہ سیف اللہ شاہ کے علم پاک کو لائٹ لگاتے ہوئے کرنٹ لگنے سے عزادار سلیم شدید زخمی ہو گیا جس کو تشویشناک حالت میں سمس اسپتال شہدادپور منتقل کیا گیا۔