ایشین پاور لفٹنگ مقابلوں میں پاکستان کے 3 تمغے

دبئی(امت نیوز) ایشیائی پاورلفٹنگ مقابلوں میں پاکستان نے ایک گولڈ، ایک سلور اور ایک برانز میڈل جیت لیا۔دبئی میں ہونے والی ایشین پاور لفٹنگ چیمپئن شپ کے پہلے روز ویرونیکا سہیل نے جونئیر کیٹیگری میں47 کلو گرام مقابلے میں سونے کا تمغہ اپنے نام کیا۔اس ایونٹ میں 9 خواتین پاور لفٹرز پاکستان کی نمائندگی کررہی ہیں جن میں 4 سہیل سسٹرز شامل ہیں،ان میں سے دوسری بہن سیبل سہیل نے سینئر کیٹیگری کے 47 کلو وزن میں برانز میڈل جیتا،جبکہ رابعہ شہزاد نے52 کلوگرام میں سلور میڈل حاصل کیاہے۔لاہور سے تعلق رکھنے والی گولڈ میڈلسٹ ویرونیکا سہیل کا کہنا ہے کہ وہ ملکی پرچم بلند کرنے پر بہت خوش ہیں اسی طرح مواقع ملتے رہے تو وہ دوسرے بین الاقوامی مقابلوں میں بھی میڈل جیت سکتی ہیں۔4 مرد پاور لفٹرز بھی چیمپئن شپ میں شریک ہیں۔