تیز رفتار گاڑیوں کی ٹکر سے معمر خاتون سمیت 2افراد جاں بحق

کراچی(اسٹاف رپورٹر) تیز رفتار گاڑیوں کی ٹکر سے معمر خاتون سمیت 2افراد جاں بحق ہوگئے۔ تفصیلات کے مطابق گلشن معمار کے علاقے معمار موڑ سپر ہائی وے پر نامعلوم گاڑی کی زد میں آکر سڑک عبور کرنے والی 70سالہ شیر بانو زوجہ حبیب اللہ شدید زخمی ہو گئی، جسے عباسی اسپتال منتقل کیا گیا جہاں اس نے دم توڑ دیا۔ پولیس کے مطابق متوفیہ قریبی گوٹھ کی رہائشی اور آبائی تعلق لاڑکانہ سے تھا۔ سائٹ بی کے علاقے شیر شاہ غنی چورنگی کے قریب گاڑی کی ٹکر سے 32سالہ نصر اللہ ولد حافظ اللہ جاں بحق ہو گیا۔ پولیس نے بتایا کہ متوفی سائٹ ایریا کا رہائشی تھا۔