قلات میں آپریشن- 4دہشت گردہلاک-2سپاہی شہید

کوئٹہ (امت نیوز)آپریشن ردالفساد کے سلسلے میں قلات کے علاقے منگوچر میں سیکورٹی فورسز کے آپریشن میں 4 دہشت گرد مارے گئے ،جبکہ 2 سپاہی بھی شہید ہوگئے۔پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق سیکورٹی فورسز نے قلات کے علاقے منگوچر میں خفیہ اطلاع پر آپریشن کیا۔آئی ایس پی آر کے مطابق آپریشن کے دوران 4 دہشت گرد ہلاک ہوگئے ،جبکہ 2 سپاہی شہید اور 2 زخمی بھی ہوئے۔ شہید سپاہی محمد وارث کا تعلق جھنگ سے ہے، بیوہ اور 2 بچے سوگوار چھوڑے ہیں ،جبکہ دوسرے شہید میرعالم کا تعلق گلگت بلتستان کے علاقےغذر سے ہے۔ ترجمان پاک فوج کے مطابق دہشت گرد بلوچستان میں دہشت گردی کی بڑی کارروائیوں کا منصوبہ بنارہے تھے۔آپریشن کے دوران 2 خودکش جیکٹس اور بڑی تعداد میں اسلحہ و گولہ بارود برآمد کیا گیا۔