جمشید کوارٹر میں گیس سلنڈر پھٹنے سے 3 افراد زخمی

کراچی (اسٹاف رپورٹر) جمشید کوارٹر میں گھر میں گیس سلنڈر پھٹنے سے بچے سمیت 3افراد زخمی ہو گئے۔ تفصیلات کے مطابق جمشید کوارٹر کے علاقے پٹیل پاڑہ فلمستان سینما والی گلی میں واقع گھر میں کام کے دوران گیس کا سلنڈر زور دار دھماکے سے پھٹ گیا جس کی آواز سے علاقے میں شدید خوف و ہراس پھیل گیا جبکہ دھماکے کی اطلاع ملتے ہی پولیس اور امدادی ٹیم موقع پر پہنچ گئی اور فوری گھر سے بچے سمیت 3افراد کو زخمی حالت میں نکال کر سول اسپتال منتقل کردیا، پولیس نے بتایا کہ اسپتال میں زخمیوں کی شناخت 5سالہ ایان احمد ولد ریحان، 55سالہ عبدالرحیم ولد عبدالرزاق اور 50سالہ خاتون روشن آرا زوجہ عبد الرحیم کے نام سے کی گئی ہے، تاہم تینوں زخمیوں کی حالت خطرے سے باہر بتائی جاتی ہے۔