فاسٹ فوڈز سینٹر میں سلنڈر زوردار دھماکے سے پھٹ گیا۔3 زخمی

کراچی(اسٹاف رپورٹر)نارتھ ناظم آباد میٹرک بورڈ آفس کے قریب واقع فاسٹ فوڈز سینٹر میں پیر اور منگل کی درمیانی شب سلنڈر زور دار دھماکے سے پھٹ گیا، جس کے نتیجے میں دکان میں آگ بھڑک اٹھی، جب کہ دھماکے میں 3 افراد بھی زخمی ہوئے۔تفصیلات کے مطابق نارتھ ناظم آباد تھانے کی حدود میٹرک بورڈ آفس کے قریب واقع معروف مٹھائی کے دکان سے کچھ فاصلے پر واقع کنگ اسپائسی فوڈ سینٹر میں پیر اور منگل کی درمیانی شب زور دار دھماکہ ہوگیا، جس کی آواز دور دور تک سنی گئی۔دھماکے کے باعث اطراف کی دکانوں کے شیشے ٹوٹ گئے۔دھماکے کے باعث دکان میں آگ بھڑک اٹھی۔رینجرز، پولیس ، بم ڈسپوزل اسکواڈ اور ریسکیو ادارے کے رضا کار موقع پر پہنچ گئے۔ فائر بریگیڈ کی ایک گاڑی نے آگ پر قابو پالیا۔دھماکے سے متاثرہ دکانوں کا سامان سڑک پر بکھر گیا۔امت کو ایس ایچ او اقبال نے بتایا کہ مذکورہ دکان بند تھی اور اس میں رکھا سلنڈر زوردار دھماکے سے پھٹ گیا، جس کے باعث دکان میں آگ بھڑک اٹھی۔اطراف کی دکانوں کے شیشے ٹوٹ گئے۔دھماکے سے برابر میں واقع پان شاپ اور اس کے ارد گرد کی دکانیں متاثر ہوئی ہیں۔ریسکیو ذرائع کے مطابق دھماکے کے باعث 3 افراد معمولی زخمی ہوئے تھے ، جو طبی امداد کے بعد گھروں کو چلے گئے ۔ پولیس کا کہنا ہے کہ ملازمین نے سلنڈر ٹھیک طرح سے بند نہیں کیا تھا۔بی ڈی ایس حکام کا کہنا ہے کہ دھماکا گیس لیکیج کی وجہ سے ہوا۔دکان کے قریب سے 2 سلنڈر ملے ہیں، جو ٹھیک حالت میں ہیں۔