متحدہ لندن کے 2ٹارگٹ کلر-گینگ وار کارندوں سمیت 14گرفتار

کراچی(اسٹاف رپورٹر)سی ٹی ڈی اور پولیس نے متحدہ قومی موومنٹ لندن کے 2خطرناک ٹارگٹ کلرز ، لیاری گینگ وار کے کارندوں سمیت 14 ملزمان کو گرفتار کرکے اسلحہ، منشیات اور موٹر سائیکل برآمد کرلی۔تفصیلات کے مطابق سی ٹی ڈی نے پاک کالونی کے علاقے میں کارروائی کرکے متحدہ لندن کے 2خطرناک ٹارگٹ کلرز کو گرفتار کرکے اسلحہ برآمد کرلیا۔ ٹارگٹ کلرز میں کمال احمد اور سید جاوید شفیق شامل ہیں۔ پولیس کا کہنا ہے کہ کمال احمد متحدہ لندن کا پاک کالونی یونٹ کا سابق انچارج ہے۔ملزمان نے دوران تفتیش پاک کالونی، گولیمار،گلبہار سمیت شہر کے مختلف علاقوں میں قتل کی متعدد وارداتیں کرنے کا اعتراف کیا ہے۔ٹارگٹ کلر کے خلاف مختلف تھانوں میں مقدمات درج ہیں۔دونوں دہشت گرد کراچی آپریشن شروع ہونے کے بعد روپوش ہوگئے تھے۔ ملیر سٹی پولیس نے لیار ی گینگ وار کے2منشیات فروشوں شہزاد بلوچ اور عارف بلوچ کو گرفتار کرکے اسلحہ اور بھاری مقدار میں منشیات برآمد کرلی۔