سینئر صحافی شیخ عزیز انتقال کرگئے-بلاول اور وزیراعلیٰ کا اظہار غم

کراچی (اسٹاف رپورٹر) سندھ کے سینئر صحافی اور روزنامہ ڈان کے نیوز ایڈیٹر شیخ عزیز گزشتہ روز انتقال کرگئے، بلاول بھٹو زرداری، وزیراعلیٰ سندھ سمیت مختلف شخصیات اور مختلف صحافی تنظیموں نے انتقال پر شدید غم و رنج کا اظہار کیا ہے۔ تفصیلات کے مطابق معروف سینئر صحافی شیخ عزیز کراچی میں انتقال کرگئے، ان کا جنازہ آج دوپہر ایک بجے مکان نمبر ای 24، نوید بنگلوز گلستان جوہر بلاک 17 بالمقابل بی اینڈ جی بینکوئٹ سے اٹھایا جائے گا، جبکہ نماز جنازہ اوورسیز مسجد گلستان جوہر بلاک 17 میں بعد نماز ظہر ادا کی جائے گی اور تدفین پہلوان گوٹھ قبرستان میں ہوگی۔ شیخ عزیز کے انتقال پر پیپلز پارٹی کےچیئرمین بلاول بھٹو زرداری اور وزیراعلیٰ مراد علی شاہ نے گہرے غم و رنج کا اظہار کرتے ہوئے کہا ہے کہ شیخ عزیز نے صحافت کی شروعات سندھی زبان سے کی، بعدازاں انہوں نے انگریزی صحافت میں گراں قدر خدمات انجام دیں۔ شیخ عزیز کی خدمات صحافتی تاریخ میں ہمیشہ یاد رکھی جائیں گی۔ وزیراعلیٰ سندھ کے علاوہ مختلف صحافتی تنظیموں نے بھی غم و رنج کا اظہار کرتے ہوئے مرحوم کی مغفرت کیلئے دعا کی ہے۔