سندھ اسپورٹس بورڈ رینکنگ ٹیبل ٹینس مقابلے

کراچی (امت نیوز)سندھ اسپورٹس بورڈ رینکنگ ٹیبل ٹینس ٹورنامنٹ میں رضا عباس نے انڈر 15بوائز سنگل جبکہ فرقان پٹیل نے انڈر18 بوائز سنگل کے فائنل جیت کر فاتح ٹرافی اپنے نام کر لی۔ اسپورٹس بورڈ کمپلیکس ناظم آباد میں جاری اس ٹورنامنٹ میں انڈر15 کا فائنل رضا عباس اور اسد سنجوانی کے درمیان کھیلا گیا جسے رضا عباس نے دو کے مقابلے میں تین سیٹ سے جیت لیا‘ جبکہ انڈر18 کا فائنل فرقان پٹیل اور شایان سلیم کے مابین ہوا جسے فرقان پٹیل نے ایک یکطرفہ مقابلے کے بعد صفر کے مقابلے میں تین سیٹ سے جیت کر فاتح ٹرافی اپنے نام کی۔ بوائز اوپن کیٹیگری میں سیمی فائنل لائن اپ مکمل ہوگئی‘ کوارٹر فائنل میں عطا عباس نے مہدی رضا کو0-4سے بلال طارق نے فرحان حسین کو1-4 سے ارسلان علوی نے نعمان سے شاہ عزیز نے عارف میمن کو3-4سے شکست دے کر سیمی فائنل کھیلنے کا اعزاز حاصل کر لیا۔