ڈکیتی مزاحمت پر گولی لگنے سے گارڈ جاں بحق

کراچی(اسٹاف رپورٹر) شہر کے مختلف علاقوں میں ڈکیتی مزاحمت اور دیگر واقعات میں فائرنگ سے سیکورٹی گارڈ جاں بحق جبکہ 3 افراد زخمی ہوگئے۔ تفصیلات کے مطابق شاہراہ نور جہاں تھانے کی حدود نارتھ ناظم آباد بلاک کے فاروق اعظم مسجد کے قریب واقع الجلال مارٹ میں چار ملزمان ڈکیتی کی نیت سے اندر داخل ہوئے اس دوران مارٹ کے باہر موجود نجی سیکورٹی کمپنی کے گارڈ کی جانب سے مزاحمت کی تو ملزمان نے فائرنگ کر کے سیکورٹی کو ہلاک کردیا۔ملزمان رقم لے کر بآسانی فرار ہو گئے۔ اسپتال میں مقتول سیکورٹی گارڈ کی شناخت 52سالہ بشیر احمد ولد رانا گل احمد کے نام سے ہوئی ہے۔سائٹ سپر ہائی وے کے علاقے جہانگیر گوٹھ میں مسلح ملزمان نے دوران ڈکیتی مزاحمت پر 2افراد 22سالہ سیف الرحمن ولد محمد اور 35سالہ سیف اللہ ولد اسماعیل کو فائرنگ کر کے زخمی کردیا۔ پاکستان بازار کے علاقے اورنگی ٹاؤن سیکٹر 16گلشن بہار میں گھر کے اندر پستول صاف کرتے ہوئے گولی چلنے سے پولیس اہلکار 25سالہ توحید ولد محمد دبیر زخمی ہو گیا۔