منگھوپیر روڈ سے مطلوب منشیات فروش بم۔چرس سمیت پکڑا گیا

کراچی(اسٹاف رپورٹر)سی ٹی ڈی انویسٹی گیشن پولیس نے منگھو پیرروڈ پر کارروائی کرتے ہوئے مطلوب منشیات فروش کو گرفتار کرلیا۔ملزم کے قبضے سے دستی بم، پستول اور ایک کلوگرام چرس برآمد ہوئی۔ملزم کے خلاف سنگین نوعیت کے 9 مقدمات درج ہیں۔تفصیلات کے مطابق سی ٹی ڈی انویسٹی گیشن پولیس نے منگھوپیر روڈ سے متعدد مقدمات میں مطلوب ملزم فرمان علی عرف ملنگ ولد حضرت علی کو گرفتار کرکے دستی بم ، اسلحہ اور ایک کلو چرس برآمد کرلی۔ڈی ایس پی سی ٹی ڈی چوہدری صفدر کے مطابق ملزم فرمان علی کے خلاف شاہ لطیف ٹائون ، بن قاسم ، منگھو پیر اور اقبال مارکیٹ سمیت دیگر تھانوں میں قتل،اقدام قتل سمیت 9مقدمات میں درج ہیں، جن میں گرفتار ملزم پولیس کو مطلوب تھا۔انہوں نے بتایا کہ گرفتار ملزم کا نام سندھ حکومت کو دی گئی مطلوب منشیات فروشوں کی فہرست میں بھی شامل ہے۔ملزم کی گرفتاری پر 10لاکھ روپے انعام مقرر رکھنے کی سفارش کی گئی تھی۔