این ایچ اے کی مزید 24گاڑیاں ساڑھے 3کروڑ روپے میں نیلام

اسلام آباد(خبرنگارخصوصی)نیشنل ہائی وے اتھارٹی کی مزید 24گاڑیاں ساڑھے 3کروڑ روپے میں نیلام کردی گئیں،مجموعی طورپر110گاڑیاں 12کروڑ49 لاکھ90 ہزار روپے میں نیلام کی جاچکی ہیں۔تفصیلات کے مطابق وزیر مملکت برائے مواصلات مراد سعیدکی خصوصی ہدایت پر این ایچ اےکے علاقائی دفتر لاہور میں گزشتہ روز 24 گاڑیاں نیلامی کیلئے پیش کی گئیں،جن سے مجموعی طور پر3کروڑ49لاکھ90 ہزارو روپے رقم حاصل ہوئی ہے۔اس موقع پر نیشنل ہائی وے اتھارٹی کے ممبر ایڈمن علی شیر محسود اور ممبر سنٹرل زون نوید اقبال واہلہ کے علاوہ دیگر سینیئرحکام بھی موجود تھے جبکہ کثیر تعداد میں گاڑیوں کے خریداروں نے بھی اس نیلامی میں شرکت کی تھی۔اس سے قبل نیشنل ہائی وے اتھارٹی کے مرکزی دفتر اسلام آباد میں 62 گاڑیاں 6کروڑ29لاکھ روپے میں، پشاور میں 15 گاڑیاں 2کروڑ 3لاکھ روپے اور ایبٹ آباد آفس میں 9گاڑیاں 1کروڑ13لاکھ روپے میں نیلا م کی گئیں۔ اب تک 110 گاڑیاں نیلام کی گئی ہیں۔ ملتان میں24اکتوبر کو 16گاڑیاں،سکھر میں 26اکتوبر کو 10 گاڑیاں،کراچی میں29 اکتوبرکو13 گاڑیاں،کوئٹہ میں31 اکتوبر کو 35 گاڑیاں جبکہ گلگت میں 5 نومبر کو 20 گاڑیاں نیلامی کیلئے پیش کی جائیں گی۔واضح رہے کہ این ایچ اے نے 219 گاڑیاں نیلامی کیلئے مختص کی ہیں جن میں 42 لگژری گاڑیاں بھی شامل ہیں۔