رینجرز-پولیس نے2لڑکیاں بازیاب کرالیں-نوجوان سمیت4گرفتار
کراچی(اسٹاف رپورٹر)رینجرز نے سہراب گوٹھ سے 3 اغواکار گرفتار کرکے مغوی لڑکی کو بازیاب کرالیا، جبکہ خواجہ اجمیر نگری پولیس نے بھی اسی طرح کی کارروائی میں نوجوان لڑکی کو بازیاب کرتے ہوئے ایک ملزم کو گرفتار کرلیا۔ تفصیلات کے مطابق پاکستان رینجرز (سندھ)نے انٹیلی جنس معلومات کی بنیاد پر سہراب گوٹھ کے علاقے لاسی گوٹھ میں واقع ایک گھر میں کارروائی کرکے 3 اغوا کاروں تاج محمد ،اکرام اللہ اور مدد علی کو گرفتار کرکے 15 سالہ مغوی لڑکی کو بازیاب کرالیا۔ ابتدائی تفتیش کے مطابق ملزمان نے 4 روز قبل لڑکی کو نصرت بھٹو کالونی سے اس وقت اغوا کیا، جب وہ گھر میں اکیلی تھی، گروہ 5افراد (3 مرد و 2خواتین) پر مشتمل ہے، جن میں 3ملزمان پکڑے گئے ہیں جبکہ خواتین کی گرفتاری کیلئے آپریشن کیا جارہا ہے، بازیاب لڑکی کو ورثا جبکہ تینوں ملزمان کو پولیس کے حوالے کردیا گیا ہے۔ اسی طرح خواجہ اجمیر نگری سے جمعے کے روز اغوا ہونوالی 17 سالہ فبیحہ کو نارتھ کراچی سیکٹر فائیو بی تھری میں کارروائی میں بازیاب کرکے ملزم وقاص کو گرفتار کرلیا۔
