سابق سری لنکن کپتان راناٹنگا قتل کے الزام میں گرفتار

کولمبو(امت نیوز)سابق سری لنکن کرکٹ کپتان اور وزیر پٹرولیم ارجنا رانا ٹنگا کو فائرنگ اورقتل کے الزام میں گرفتار کر لیا گیا۔سری لنکا میں سیاسی بحرا ن دوران کولمبو میں اتوار کوفائرنگ کے نتیجے میں ایک شخص ہلاک اور دو زخمی ہو گئے تھے۔رانا ٹنگا نے بتایا کہ میں سیلون پیٹرولیم کارپوریشن کے دفتر سے اپنا سامان حاصل کرنے کی کوشش کر رہا تھا کہ مخالف سیاسی جماعت کے مشتعل کارکنوں نے میرا گھیراؤ کر لیا۔وہ مجھے مارنے کے لیے آئے تھے جس پر سیکورٹی نے فائرنگ کی۔ اسپیشل ٹاسک فورس نے انہیں ہیلمٹ پہنا کر مشتعل افراد کے نرغے سے نکالا۔ رانا ٹنگا کو مجسٹریٹ کے روبرو پیش کیا گیا جس نے انہیں ضمانت پر رہا کردیا۔رانا ٹنگا کی قیادت میں سری لنکا نے 1996کا کرکٹ ورلڈ کپ جیتا تھا۔