قائداعظم ون ڈے کپ سیمی فائنل مرحلے میں داخل

اسلام آباد(امت نیوز) پاکستان واپڈا، حبیب بینک اور کے آر ایل کی ٹیمیں قائداعظم ون ڈے کرکٹ کپ کے سیمی فائنل مرحلے میں پہنچ گئیں۔ سیمی فائنل مرحلہ (کل) جمعرات سے شروع ہوگا۔ پاکستان کرکٹ بورڈ کے ترجمان شکیل خان نے بتایا کہ پاکستان کرکٹ بورڈ (پی سی بی ) کے زیراہتمام قائد اعظم ون ڈے کرکٹ ٹورنامنٹ میں ملک بھر سے 16 ٹیمیں حصہ لے رہی ہیں جن میں لاہور وائٹس، سوئی نادرن گیس پائپ لائینز، پشاور، کہوٹہ ریسرچ لیبارٹریز(کے آر ایل)، اسلام آباد، حبیب بینک، فاٹا اور نیشنل بینک آف پاکستان، کراچی وائٹس، پاکستان واپڈا، راولپنڈی، سوئی سدرن گیس پائپ لائنز، ملتان، پی ٹی وی، لاہور بلیو اور زرعی ترقیاتی بینک کی ٹیمیں شامل ہیں۔ ٹورنامنٹ کا سیمی فائنل مرحلہ یکم نومبر سے جبکہ فائنل میچ 4 نومبر کو کھیلا جائے گا۔