پاکستان نے اسنوکر ورلڈ کپ کیلئے ٹیم کا اعلان کردیا

اسلام آباد (امت نیوز) پاکستان بلیئرڈ اینڈ سنوکر ایسوسی ایشن نے آئی بی ایس ایف سنوکر ورلڈ کپ کے لئے 5 رکنی قومی ٹیم کا اعلان کر دیا ہے۔ جمعہ کو پاکستان بلیئرڈ اینڈ سنوکر ایسوسی ایشن کے ترجمان نوید کپاڈیہ نے بتایاکہ ورلڈ سنوکر کپ 18 سے 27 نومبرتک میانمر کے شہر ینگون میں منعقد ہو گا جس کے لئے 4 کھلاڑیوں اور ایک آفیشل کاانتخاب کیا گیا ہے، کھلاڑیوں میں بابر مسیح، محمد آصف اور محمد بلال مینز کیٹیگری میں جبکہ عمران شہزاد ماسٹرز کیٹیگری میں پاکستان کی نمائندگی کریں گے۔ اسی طرح نوید کپاڈیہ بطور ریفری ٹیم کے ہمراہ ہوں گے۔ ایونٹ میں دنیا بھر سے 52 سے 55 ممالک کی ٹیمیں شرکت کریں گی۔ انہوں نے کہاکہ بلیئرڈ اینڈ سنوکر ایسوسی ایشن نے ورلڈ کپ کیلئے کھلاڑیوں کو بھرپور تربیت دی گئی ہے۔