لندن میں چاقو بردار کے حملے سے 2 افراد شدید زخمی-ملزم گرفتار

لندن(امت نیوز) لندن میں میوزک کمپنی کے دفتر میں چاقو بردار کے حملے سے 2 افراد شدید زخمی ہوگئے، پولیس نے حملہ آور کو حراست میں لے لیا، حکام کا کہنا ہے کہ حملہ دہشت گردی کی وارادات نہیں ہے۔ تفصیلات کے مطابق واقعہ علی الصبح ڈیلی میل اخبار کے صدر دفتر کے سامنے قائم سونی میوزک کمپنی کی مرکزی عمارت میں پیش آیا، جہاں ایک نامعلوم گورے نے اچانک چاقو سے وار کرکے 2 افراد کو شدید زخمی کردیا، ملزم واردات کے بعد فرار ہونے کی کوشش میں دھر لیا گیا۔ پولیس نے ملزم کو حراست میں لینے کے بعد احتیاطی تدبیر کے طور پر عمارت کو فوری طور پر خالی کرالیا اور سرچ آپریشن کیا- حکام کا کہنا ہے کہ واقعہ دہشت گردی کا نتیجہ نہیں ہے، جبکہ ملزم کی شناخت سے متعلق بھی میڈیا کو کچھ نہیں بتایا گیا ہے۔ واقعے کے بعد سونی میوزک کے سیکڑوں کارکنوں و ملازمین نے سڑک پر احتجاج بھی کیا۔