میری گرفتاری کا راستہ ڈھونڈا جارہا ہے-زرداری

نواب شاہ(مانیٹرنگ ڈیسک)پیپلزپارٹی کے شریک چیئرمین آصف علی زرداری نے کہا ہے کہ ہم نے اپنے وسائل سے ملک چلایا کشکول نہیں اٹھایا تاہم ہمارے ملک کا وزیراعظم کشکول لے کر دنیا میں گھوم رہا ہے۔ مجھے گرفتار کرنے کے لیے راستہ ڈھونڈا جارہا ہے لیکن انہیں میری گرفتاری کے لیے ثبوت نہیں مل رہے ہیں۔نواب شاہ میں ایک تقریب سے خطاب کرتے ہوئے سابق صدر آصف علی زرداری نے کہا کہ نوازشریف اور عمران خان کو ڈیل کے ذریعے اقتدار میں لایا گیا، انہیں ڈیل کرانے والے لے تو آتے ہیں پر ان سے ملک چلایا نہیں جاتا جب کہ ہم نے بغیر ڈیل کے حکومت حاصل کی اور ملک چلاکر دکھایا۔سابق صدر کا کہنا تھا کہ مجھے گرفتار کرنے کے لیے راستہ ڈھونڈا جارہا ہے، انہیں میری گرفتاری کے لیے ثبوت نہیں مل رہے ہیں، مجھے پہلے بھی گرفتار کیا گیا تھا، اب گرفتاری ہوئی تومیری سیاسی ساکھ بڑھے گی۔پیپلزپارٹی کے شریک چیئرمین نے مزید کہا کہ وزیراعظم کشکول لے کر دنیا بھر میں پھررہے ہیں، حکومت سے لڑائی میری لیے نئی بات نہیں۔سابق صدر کا کہنا تھا کہ نواز شریف جب بھی اقتدار میں آئے ڈیل کرکے آئے اور موجودہ وزیراعظم بھی ڈیل کے تحت آئے ہیں، ڈیل کرنے والوں کو ڈیل کرنی آتی ہے لیکن ملک چلانا نہیں آتا۔