ٹی ٹونٹی سیریز میں کلین سویپ کرنیوالے گرین شرٹس کوون ڈے میں شکست

ابو ظبی(امت نیوز) ٹی ٹونٹی سیریز میں فاتح گرین شرٹس ون ڈے میں شکست کھا گئے،پہلے ون ڈے میں نیوزی لینڈ کی 47 رنز سے فتح۔تفصیلات کے مطابق دبئی کے شیخ زید اسٹیڈیم میں کھیلے گئے میچ میں نیوزی کے 267رنز کے ہدف کے تعاقب میں پاکستانی بیٹنگ لائن مکمل طور پر ناکام ہوگئی اور پوری ٹیم 219 رنز پر ڈھیر ہوگئی۔ٹرینٹ بولٹ8 کے مجموعے پر فخرزمان، بابر اعظم اور محمد حفیظ کو پویلین بھیج دیا جب کہ امام الحق 34اور شعیب ملک 30رنز بنا کر چلتے بنے۔سرفراز احمد نے عماد وسیم کے ساتھ 103رنز کی شراکت داری قائم کی اور 64رنز پر بولڈ ہوگئے۔عماد وسیم 50،شاداب خان 7،حسن علی 16،شاہین شاہ آفریدی صفر جب کہ جنید خان ناٹ آؤٹ رہے۔ نیوزی لینڈ کی جانب سے بولٹ اور فرگوسن نے 3،3 جبکہ گرینڈ ہومے نے 2،ساؤتھی اور سوڈھی نے ایک ایک وکٹ حاصل کی۔ نیوزی لینڈ کے منرو 29اور کپتان ولیمسن 27رنز بنا کر آؤٹ ہوئے۔ 78پر تین کھلاڑیوں کے پویلین لوٹنے کے بعد بیٹسمین روس ٹیلر نے لیتھم کے ساتھ مل کر 130رنز کی شراکت داری کی،لیتھم 68رنز بنا کر شاداب خان کا شکار بنے، نوجوان اسپنر اگلی ہی گیند پر نکولس کو چلتا کیا جب کہ وہ ہیٹ ٹرک میں کامیاب نہ ہوسکے اور ایک گیند کے بعد گرینڈ ہومے کو بھی پویلین کی راہ دکھا دی،دو رنز کے اضافے کے ساتھ روس ٹیلر بھی 80رنز پر عماد وسیم کی گیند پر بولڈ ہوگئے۔