فیصل آباد سے 4- پشاور میں1 دہشت گردگرفتار

فیصل آباد ؍پشاور(امت نیوز؍مانیٹرنگ ڈیسک) انسداد دہشت گردی فورس نے فیصل آباد سے کالعدم تنظیم کے 4 دہشت گرد گرفتار کر لئے جبکہ پشاور میں کارروائی کرتے ہوئے دہشتگرد کوگرفتار کرکے دستی بم بر آمد کر لیا۔سی ٹی ڈی حکام کے مطابق گرفتار دہشت گردوں میں عارف، سعود الرحمٰن، اکمل اور محمد ارشاد شامل ہیں جنہیں خفیہ اطلاع پر ستیانہ روڈ سے گرفتار کیا گیا۔4دہشتگردوں کا تعلق کالعدم تنظیم سےہے جن کے قبضہ سے بارودی مواد،4 ڈیٹونیٹرز اور اسلحہ سمیت دیگر سامان برآمد کر لیا گیا ۔گرفتار دہشت گرد فیصل آباد میں حساس اداروں کو ہدف بنانا چاہتے تھے جن سے نامعلوم مقام پر تفتیش جاری ہے۔پشاور میں سکیم چوک میں چھاپہ مارکارروائی کرتے ہوئے دہشتگرد کو دھر لیا جس کے قبضے سے دستی بم بھی برآمد ہوا ۔ ابتدائی تحقیقات میں گرفتار ملزم کی شناخت انور کے نام سے ہوئی اوراس نے انکشاف کیا کہ وہ کا لعدم تنظیم کاکارکن ہے۔ تاہم پولیس نے زیر حراست دہشتگرد کو نامعلوم مقام پر منتقل کردیا ہے۔