ہالا میںبچوں کے جھگڑے پر سسر نے داماد مار ڈالا

ہالا (نامہ نگار) نیو سعید آباد میں سسر نے بچوں کے جھگڑے پر ہالا کے رہائشی داماد کو قتل کر دیا، مقتول کی لاش مٹیاری کے نواحی ڈہدری موری سے برآمد ہوئی ہے۔ نیو سعیدآباد پولیس نے ہالا کے تھلہ روڈ کے رہائشی کی درخواست پر گاؤں زیر پیر میں کارروائی کرکے ملزم سسر مرید لغاری کودو بیٹوں کے ہمراہ گرفتار کرکے نامعلوم جگہ منتقل کردیا، قاتل سسر مریدلغاری نے داماد علی گل خاصخیلی کو قتل کرکے لاش کینال میں پھینکنے کا پولیس کے سامنے اعتراف کرلیا ہے۔ ملزم سسر کے اعتراف جرم کے بعد مقتول کی والدہ میرزادی زوجہ مولابخش کی فریاد پر زیردفعہ 302 ،201،34 پی پی سی کے تحت نیوسعیدآباد تھانے میں مرید لغاری،شاہنواز اور افضل کے خلاف مقدمہ درج کرلیا گیا ہے۔ دوسری طرف پولیس قریبی روہڑی کینال میں مقتول کی لاش کو ڈھونڈنے کے لئے سرچ کرتے ہوئے لاش کو مٹیاری کے نواحی ڈہدری موری سے برآمد کرلیا ہے۔