ذاتی دشمنی پر نیو کراچی میں میاں بیوی گھر کے اندر قتل – بیٹی زخمی

کراچی(اسٹاف رپورٹر) سہراب گوٹھ میں دشمنی کی بنا پر مسلح ملزمان کی فائرنگ سے میاں بیوی جاں بحق اور بیٹی زخمی ہوگئی، جبکہ فائرنگ کے دیگر واقعات میں 4 افراد زخمی ہو گئے۔ تفصیلات کے مطابق سہراب گوٹھ کے علاقے نیو کراچی لاسی گوٹھ کی کچی آبادی سائیں داد گوٹھ میں واقع گھر میں نامعلوم ملزمان نے داخل ہو کر اندھا دھند فائرنگ کردی اور موقع سے فرار ہو گئے، واقعے کی اطلاع ملتے ہی پولیس نے موقع پر پہنچ کر 2 خواتین سمیت 3 افراد کو شدید زخمی حالت میں عباسی اسپتال منتقل کیا ،جہاں پر دوران علاج زخموں کی تاب نہ لاتے ہو ئے خاتون اور مرد نے دم توڑ دیا، ایس ایس پی ملیر عرفان بہادر نے بتایا کہ جاں بحق ہونے والوں کی شناخت45 سالہ ضمیر احمد ولد یوسف اور40 سالہ بھاگل زوجہ ضمیر احمد کے نام سے کی گئی جو کہ آپس میں میاں بیوی تھے جبکہ مقتولین کی بیٹی سومل کی حالت تشویشناک بتائی جاتی ہے۔ واقعہ ذاتی دشمنی کا شاخسانہ ہے، تاہم واقعے کی مزید تفتیش کررہے ہیں۔تاہم پولیس نے کارروائی کے بعد لاشیں سرد خانے منتقل کردی ہیں۔ جوہر آباد کے علاقے فیڈرل بی ایریا بلاک نمبر 15میں نامعلوم ملزمان نے دوران ڈکیتی مزاحمت پر فائرنگ کر کے 25 سالہ فیضان ولد شریف کو زخمی کردیا، شارع نورجہاں کے علاقے قلندریہ چوک پر کشمیر ہوٹل کے قریب نامعلوم ملزمان نے ڈکیتی مزاحمت پر فائرنگ کرکے 2 افراد 25 سالہ سلمان ولد ریاض اور 27 سالہ سنیل ولد امانت کو زخمی کردیا اور موقع سے فرار ہوگئے۔بلوچ کالونی کے علاقے منظور کالونی میں واقع شالیمار بیکری کے قریب نامعلوم سمت سے آنے والی گولی لگنے سے 30 سالہ توصیف زخمی ہو گیا۔