چنگچی رکشوں کیخلاف کارروائی تیز- سینٹرل میں 13 ضبط

کراچی(اسٹاف رپورٹر)ایس ایس پی سینٹرل ارم اعوان نے شہر کی گنجان آبادیوں میں سپریم کورٹ کے احکامات کے خلاف سڑکوں پر رواں دواں چنگچی رکشوں کا سختی سے نوٹس لیا اور 13 رکشے بند کردیئے۔انہوں نے ٹریفک پولیس کو ہدایات دیں کہ چنگچی رکشہ ڈرائیورز اور مالکان کے خلاف سخت کارروائی کی جائے، جس کے بعد ایس او بفرزون سرفراز الدین اور ایس او نیو کراچی ٹریفک سیکشن نے کارروائی کرتے ہوئے 11چنگچی رکشے بند کردیے، جبکہ ناظم آباد اور لیاقت آباد سے بھی ایک ، ایک رکشہ بند کردیا گیا۔ایس ایس پی ارم اعوان کا کہنا ہے کہ سپریم کورٹ کے احکامات کی پاسداری کرتے ہوئے شہر کی گنجان آبادیوں میں چلنے والے چنگچی رکشوں کے خلاف کارروائی جاری رہے گی۔