بہار کالونی میں گودام جلنےسے لاکھوں کا کپڑاخاکستر

کراچی (اسٹاف رپورٹر) بہار کالونی کے گودام میں آگ لگنے سے لاکھوں کا کپڑا جل گیا۔ فائر بریگیڈ نے 5گاڑیوں کی مدد سے ایک گھنٹے میں آگ پر قابو پالیا۔ تفصیلات کے مطابق چاکیواڑہ بہار کالونی میں واقع گھر میں قائم کپڑوں کےگودام میں ہفتہ لکی صبح اچانک آگ بھڑک اٹھی، جس نے دیکھتے ہی دیکھتے پورے گودام کو اپنی لپیٹ میں لے لیا اور دھویں و شعلوں سے علاقے میں شدید خوف و ہراس پھیل گیا۔ آگ کی اطلاع ملتے ہی امدادی ٹیمیں، پولیس اور دیگر ادارے پہنچ گئے اور فوری طور پر گودام اور اطراف کے رہائشی افراد کو باحفاظت باہر نکال کر فائر بریگیڈ کو بھی طلب کرلیا، جس پر2 گاڑیاں موقع پر پہنچ گئیں اور آگ پر قابو پانے کی کوشش کی، تاہم آگ کی شدت پر مزید3 گاڑیوں کو طلب کیا گیا۔ ترجمان نے کہا کہ پانی کی کمی کے باعث واٹر بورڈ سے رابطہ کرکے متعدد ٹینکربھی منگوائے گئے اور ایک گھنٹے بعد آگ پر قابو پالیا۔ ترجمان نے مزید کہا کہ لاکھوں کا سامان جل گیا، جبکہ آگ کی وجہ معلوم نہ ہوسکی۔