دبئی ٹیسٹ میں یاسرنے کیویز کو چکرادیا-پاکستان کی پوزیشن مضبوط

دبئی(مانیٹرنگ ڈیسک)قومی ٹیم کے لیگ سپنر یاسرشاہ نیوزی لینڈ کیخلاف ایک اننگزمیں8وکٹ لے کر عبدالقادر،سرفراز نواز،عمران خان،سکندر بخت اورثقلین مشتاق کے ساتھ فہرست کا حصہ بن گئے ہیں۔لیگ سپنر نے دبئی ٹیسٹ میچ کے تیسرے دن نیوزی لینڈ کے ایک اننگز میں 41رنز کے عوض 8کھلاڑی آئوٹ کئے،دبئی ٹیسٹ میں نیوزی لینڈ کی ٹیم اپنی پہلی اننگز میں 90رنز بنا کر فالو آن کا شکار ہوگئی جبکہ دوسری اننگز میں مہمان ٹیم نے2وکٹوں کے نقصان پر 131رنز بنالیے۔ تیسرے دن کا کھیل ختم ہوا تو نیوزی لینڈ کے ٹام لیتھم 44اور روس ٹیلر 49رنز بناکر ناٹ آؤٹ ہیں اور اور کیوی ٹیم 197 رنز کے خسارے میں ہے۔دبئی ٹیسٹ کے تیسرے روز یاسر شاہ نے تباہ کن بولنگ کا مظاہرہ کرتے ہوئے کسی کیوی بلے باز کو کریز پر زیادہ دیر کھڑے ہونے نہ دیا اور 41رنز کے عوض 8کھلاڑیوں کو پویلین کی راہ دکھائی۔کین ولیمسن کی قیادت میں کیوی ٹیم اپنی پہلی اننگز میں صرف 90رنز پر ڈھیر ہوگئی جس میں 6بلے باز بغیر کوئی رنز بنائے آؤٹ ہوئے۔