پاکستانی پاور لفٹر مصطفی فرحان آج منگولیا روانہ ہونگے

اسلام آباد (امت نیوز) پاکستان کے مصطفی فرحان بیگ ایشین کلاسک پاورلفٹگ چیمپئن شپ میں شرکت کیلئے (آج) بدھ کو منگولیا کیلئے روانہ ہوں گے۔ پاکستان پاورلفٹگ فیڈریشن کے سیکرٹری جنرل محمد راشد ملک نے بتایاکہ چیمپئن شپ میں آٹھ کیٹیگریز کے مقابلے رکھے گئے ہیں جن میں59 کلوگرام، 66 کلوگرام، 74 کلوگرام، 83 کلوگرام، 93 کلوگرام، 105 کلوگرام، 120 کلوگرام اور پلس 120 کلوگرام کے مقابلے شامل ہیں جبکہ مصطفی فرحان بیگ چیمپئن شپ کے 93 کلوگرام مقابلوں میں پاکستان کی نمائندگی کریں گے یہ مقابلے 7 دسمبر کو کھیلے جائیں گے۔ چیمپئن شپ میں 27 ملکوں سمیت پاکستان، منگولیا، تائیوان، کوریا، بھارت، جاپان، انڈونیشیا، فلپائن، ترکمانستان، قازقستان، سنگا پور، ازبکستان، ایران، عراق، متحدہ عرب امارات اور سری لنکا کی ٹیمیں شامل ہیں۔